Syfyr me vajzën e Myftiut Tërnava

Mos nxirrni përfundime nga titulli. Nuk është ajo që po mendoni, por më keq.

Ndoshta jo shumë keq për mënyrën e funksionimit të Kryesisë së Bashkësisë Islame të Kosovës (BIK), organizatë e paregjistruar, sikurse edhe bashkësitë e tjera fetare, por që ka një buxhet vjetor, plus-minus, prej afro 6 milionë eurosh.

Afro 6 milionë euro buxhetin vjetor e ka vetëm Kryesia e BIK, derisa këshillat lokal të BIK-ut kanë buxhete të tjera, prej të cilave mbahet kjo kryesi burokratësh, e udhëhequr kryesisht prej familjes Tërnava e Simnica dhe miqve e dhëndurëve të tyre, pa përjashtuar as ata që s’kanë lidhje gjaku me ta, por jarani e tregojnë prirje serviliteti.

Por, në një nga syfyrët e parë të këtij muaji të Ramazanit pashë që për kreun e kësaj organizate me qarkullim multi-milionësh s’ka kufi favorizimi i të afërmeve.

As më pak, e as më shumë, se sytë prej gjumit m’u qelën  me fytyrën e vajzës së tij, Refiqes, që po moderonte një emision të sponsorizuar nga BIK, që e udhëheq babai i saj, dhe që transmetohet në Radiotelevizionin e Kosovës (RTK). Televizion publik me status zyrtar.

BIK-u njofton në faqen e saj në internet me rastin e muajit të madhërishëm të Ramazanit, këtë vit enkas për Ramazan ka përgatitur një cikël të ri të emisioneve fetare.

Emisionet janë realizuar në formë debati me teologë dhe ekspertë të fushave të ndryshme dhe , siç thuhet në këtë faqe, kanë tema që kanë të bëjnë me Ramazanin, Namazin, Bamirësinë, Kuranin, Tolerencën fetare , Fenë dhe Shkencën, Arsimimin, metodat e komunikimit, etj.

Ku ta dimë a janë kështu?

Pse a kemi të drejtën të dyshojmë në diçka që e prodhoi BIK-u e ia miratoi dikush nga menaxhmenti i RTK-së për transmetim?!

Në BIK nuk duan të flasin as sa ka kushtuar ky cikël emisionesh e kush është donator tjetër e as si është zgjedhur biznesi ku realizohet emisioni, biznes që i bëhet reklamë sa më shpesh që mundën, në televizionin publik.

Kam pritur të më përgjigjen edhe se si janë zgjedhur anëtarët e stafit që e realizojnë këtë emision, e në veçanti moderatorët, por as për këtë nuk kanë përgjigje në organizatën multi-milionëshe që udhëheq Myftiu Tërnava.

Krejt do ua bëja hallall të mos më përgjigjeshin, pasi që muaji i Ramazanit është muaj i mëshirës dhe faljes, por është e pafalshme që nuk na treguan:  Sa paguhet Refiqe Ternava për këtë projekt?

Refiqja ende në këtë emision paraqitet veç me një mbiemër, me mbiemrin e babit të saj-Tërnava, që më lehtëson kur e zë në gojë emrin e saj si për moderim ashtu edhe për atë se sa para i mori nga organizata që e udhëheq babai i saj, ani pse sindikalistët e BIK-ut e patën akuzuar Tërnavën se sikurse tash vajzën, më herët ka favorizuar dhëndrin.

“Dhëndëri i Naim Tërnavës, një djalosh që quhet Hysni Beka është punësuar së fundi në Kryesinë e BIK-ut pa konkurs”, thuhet në një letër publike të sindikalistëve të BIK-ut, që për zyrtarët e kësaj organizate janë thjeshtë të përdalur dhe thyes te rendit kushtetues. Jo të Kushtetutës që e shkeli Fatmir Sejdiu e u shkel për Behgjet Pacollin, por të Kushtetutës së BIK-ut.

Për BIK-un nuk janë gjë milionët e “shllajfitur” nëpër vite, që nuk zgjojnë interes as për institucionet e ndjekjes. Për asnjërën palë nuk qon peshë fakti që në vitin 2009 kësaj organizate të paregjistruar i tepruan mbi 2.2 milionë euro që i qoi në bankë, derisa në komuna të ndryshme të Kosovës punëtorët e saj mbesin prapa edhe për gjysmë viti me paga.

Sikur të mos i mjaftonte, në vitin 2010 ajo qoi edhe 900 mijë euro të tjera në bankë, derisa në ndërtim të buxhetit, sipas raporteve që ia miratoi edhe Kuvendi i vetë, nuk i futi në punë hiç 2.2 milionëshin e 2009-ës.

BIK-u kurrë nuk pati një shpjegim se ku mbetën 2.2 milionë euro, Ata dinë të thonë vetëm se “qisajde dikah napër banka janë. Si ka prek kërkush. Krejt letrat i kena….”, por qe që nuk i qesin ato letra, ani pse një pjesë të madhe të buxhetit e ndërtojnë me anëtarësinë obligative për myslimanë prej 3 eurosh.

Nëse dikush dyshon që kjo është obligative, mos ta paguaj dhe le të pretçka i ndodh në ceremoninë e vdekjes së ndonjë të afërmi.

Krahasuar me milionat që shkojnë e vijnë, e përmblidhen në vetëm 4 faqe raport, që edhe ashtu duhet ta nxjerrë për publikim tinëz, favorizimi i vajzës për Myftiun Tërnava është “cikërrimë”.

Ndoshta edhe ka zbatuar këshillën fetare që në muajin e Ramazanit të shtohet mëshira ndaj familjes, e ia ka nxjerr edhe një rrogë vajzës, se që duhet gjithqysh të jetë më e mira ndër krejt vajzat fetare, që të drejtoi emisionin fetar në televizioni publik, këtë as që duhet ta vëmë në dyshim.

Refiqja është vajza e Naim Tërnavës. A duhet diçka më shumë?!

Sido që të jetë, me këtë emision, dhe më moderimin e vajzës së Myftiut vazhdoj të zgjohem e ha syfyr tash e tutje. Nuk e lëshoj këtë rast, pasi që e di që jam pjesë e një audience të madhe, pasi që këtë emision të syfyrit të RTK-së, menjëherë pas iftarit mund t’i ndiqni edhe në TV lokale që transmetohen në rrjetin tokësor dhe kabllor, si: TV Besa, TV Mitrovica, TV Dukagjini, Syri Vizion, TV Vali, TV Festina, TV Iliria e Star TV.

Autor: Visar Duriqi