Zbulohet personi që e regjistroi në KQZ institutin e dyshimtë /Dokument/

Institutit Rajonal për Demokraci të Drejta të Njeriut dhe Studime Politike është përfolur shumë ditëve të fundit, meqenëse pa ndonjë aktivitet paraprak është regjistruar me 5,000 persona për të vëzhguar zgjedhjet e nesërme.

Dy organizata joqeveritare, “D+” dhe “Çohu” kanë reaguar me shqetësim duke thënë se prapa tij mund të qëndrojnë parti politike.

Më vonë reagoi edhe ish-deputetja e Kuvendit të Kosovës, Albulena Haxhiu, e cila tha se vëzhguesit e angazhuar nga kjo organizatë janë militantë të koalicionit PDK-AAK-Nisma, duke kërkuar po ashtu ndërhyrjen e Policisë dhe Prokurorisë, sepse, sipas saj, përmes këtij instituti tri partitë po përpiqen ta manipulojnë procesin zgjedhor.

Ndërkohë, Periskopi ka siguruar formularin e institutit për akreditim në KQZ.

Ky institut ka aplikuar për t’u akredituar në KQZ përmes Astrit Rexhajt, përfaqësuesit të saj të autorizuar. Ndërsa, nga burime portali merr vesh se Rexhaj është edhe drejtor i institutit.

Periskopi mëson gjithashtu se Rexhaj ka qenë më parë këshilltar i Ramush Haradinajt, kryetarit të AAK-së dhe ish-kryeministrit të Kosovës, ndërsa nuk dihet për angazhimet aktuale të tij. /Periskopi/

 

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *