Në Medresenë e Mesme “Alauddin” në Prishtinë përurohen librat e dy nxënëseve të kësaj shkolle

E hëna e 22 majit nuk ishte ditë e zakonshme për Medresenë e Mesme Alauddin në Prishtinë. Këtë ditë dy nxënëse të kësaj shkolle, Sara I. Hasani dhe Jetlira Ramadani prezantuan krijimtarinë e tyre artistike letrare, duke përuruar secila prej tyre librin e parë, respektivisht “Një duet me heshtjen” dhe “Ëndrra në sirtar”.
Para mysafirëve të pranishëm drejtori i shkollës, Jakup ef. Çunaku, shprehu ngazëllimin për këtë arritje të nxënëseve të Medresesë së Mesme “Alauddin”, duke çmuar punën dhe krijimtarinë e tyre artistike letrare. “Guximi i këtyre dy vajzave për të dalë me tituj letrarë flet shumë. Flet për emancipimin e femrës myslimane në shoqërinë tonë, si dhe për nivelin që ka ajo krahas shoqërisë në përgjithësi. Pra, femra myslimane kosovare sot është elita e shoqërisë: e shkolluar dhe e emancipuar barabar me gjithë femrat e vendeve të botës së zhvilluar”, tha ndër të tjera drejtori Çunaku, duke uruar vajzat për punën dhe promovimin e krijimtarisë së tyre letrare.
Një përshëndetje për të pranishmit bëri edhe redaktori i dy librave, Besnik Jaha. Pas përshëndetjes për mysafirët, ai para audiencës bëri edhe dekodimin e titullit të përmbledhjes me poezi të Sara I. Hasanit, “Një duet me heshtjen”. “Thotë një varg: “Heshtja është një britmë e madhe” Sara, duke bërë dialog me heshtjen, na ka dhuruar disa “britma” (poezi), me të cilat ka thënë shumë. Nuk janë pak 948 vargje të arrira poetike për një nxënëse të moshës së saj. Njësoj nuk janë pak as 28 krijime prozaike të Jetlirës, që ka arritur të përshkruajë mjaft mirë mendësinë e një vajze që preokupohet me gjithë çfarë e rrethon. Prandaj, urime secilës!”, tha ndër të tjera profesor Besnik Jaha, duke përfunduar se ishte kënaqësi e veçantë që ishte lexuesi i parë i veprave të para të këtyre dy shkrimtareve të ardhshme.
Pas një leximi të disa pjesëve nga libri, një përshëndetje dhe falënderim dhanë edhe autorët e veprave, Sara I. Hasani dhe Jetlira Ramadani. Secila falënderuan shumë familjet për përkrahje, ndërsa shprehën mirënjohje të thellë ndaj Bashkësisë Islame të Kosovës për stimulim dhe promovim të veprave të tyre artistike letrare.
Në fund të takimit të pranishmit u ftuan edhe në një koktej rasti.

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *