Delawie: Të akuzuarit për korrupsion, jashtë listave

Ambasadori amerikan Greg Delawie ka përsëritur qëndrimin e tij se në listat zgjedhore nuk ka dëshirë të shohë njerëz me aktakuza për korrupsion. Këto thirrje Delawie i ka bërë dje gjatë një takimi që ka mbajtur në KQZ, ku është takuar me kryetaren e këtij institucioni, Valdete Daka, shkruan sot, gazeta Zeri.

Ai gjithashtu nga selia e KQZ-së ka ftuar qytetarët e Kosovës të dalin dhe të votojnë pasi, siç tha ai, “e ardhmja e vendit është në duart tuaja”. “Dua që ta dini se çdo votë ka rëndësi dhe e ardhmja e vendit tuaj është në duart tuaja. Ka persona që në këto zgjedhje votojnë për herë të parë, prandaj është e rëndësishme që të mos ketë persona me aktakuza për korrupsion. Njerëzit e Kosovës meritojnë zgjedhje të lira”, ka thënë Delawie.

Delawie gjithashtu tha se Kosova ka shumë liderë të talentuar, të cilët nuk janë të përfshirë në aktivitete politike. “Kosova ka shumë liderë të talentuar, të cilët nuk janë të përfshirë në këto aktivitete pasi nuk u është dhënë rasti”, ka shtuar ai.

Ai u ka bërë thirrje të gjitha subjekteve politike për organizimin e një procesi zgjedhor demokratik më 11 qershor. “Bëjmë thirrje për zgjedhje të lira, fer dhe demokratike”, ka thënë Delawie. Njëherësh Delawie bëri thirrje për fushatë dinjitoze, për transparencë dhe sigurimin e të gjitha kushteve për punë për mediet, monitoruesit dhe vëzhguesit e zgjedhjeve. Ai i ka dhënë mbështetje të plotë Komisionit Qendror të Zgjedhjeve.

Ndërsa kryetarja e KQZ-së, Valdete Daka, ka thënë se është një nder për KQZ-në që në këtë kohë ta kenë mysafir ambasadorin Delawie. Ajo theksoi se meqë vendi është në prag të zgjedhjeve parlamentare po i përmbushin detyrimet kushtetuese dhe ligjore. “Në nëntorin e vitit të kaluar pashë nga afër organizimin e zgjedhjeve në vendin tuaj dhe u ktheva me bindjen që edhe ne mund ta bëjmë të njëjtën gjë. Edhe tani kur jemi në kohë të zgjedhjeve po përmbushim detyrimet kushtetuese dhe ligjore. Nga këtu dua t’i garantoj të gjithë akterët e këtij procesi zgjedhor dhe sidomos qytetarët tanë se Komisioni Qendror i zgjedhjeve mbetet i vendosur që do të punojë pa reshtur për organizimin e këtyre zgjedhjeve, ashtu siç kërkohet me Kushtetutën dhe ligjet në fuqi dhe me standardet ndërkombëtare”, tha ajo.

Daka ka thënë se KQZ-ja ka nënshkruar një memorandum bashkëpunimi me Bashkimin Evropian (BE), që të sjellin vëzhgues gjatë zgjedhjeve të 11 qershorit. “Ne sot kemi nënshkruar memorandum bashkëpunimi me Bashkimin Evropian, nga të cilët presim që të sjellin vëzhgues të këtyre zgjedhjeve. Padyshim që presim edhe organizatat tjera joqeveritare dhe mediet që t’i vëzhgojnë këto zgjedhje”, ka thënë Daka.

“Zgjedhjet e lira dhe demokratike janë themeli i angazhimit tonë institucional”, ka shtuar ajo.

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *