Deputetët e Kosovës 2000 euro pagë – të Serbisë 840 euro

Deputetët e Kosovës kanë pagat më të larta krahasuar me deputetët e vendeve fqinje. Njohësit e ekonomisë dhe analistët politikë thonë se në një vend si Kosova me varfëri dhe papunësi të madhe është e papranueshme që pagat e deputetëve të shkojnë deri në 2000 euro.

Shteti më i varfër në rajon paguan më së shumti deputetët e tij. Deri në 2000 euro marrin paga mujore deputetët e Kosovës, derisa ata të Serbisë nuk marrin as 1000 euro në muaj. Gazeta “Zëri” ka nxjerrë të dhënat e pagave mujore të shteteve të rajonit dhe del se Kosova edhe në krahasim me Malin e Zi, Maqedoninë dhe Shqipërinë mbetet në top-listë për nga rrogat e deputetëve të saj.

 

Paga bazë e deputetëve të Kosovës është 1488 euro e kur kësaj i shtohen edhe përfitimet tjera si mëditje për pjesëmarrje në seancë, në mbledhje të komisioneve, si dhe udhëtime jashtë vendit, ajo arrin në rreth 2000 euro.

Pas deputetëve të Kosovës të dytët më të paguarit janë ata të Malit të Zi, paga bazë e të cilëve është 1200 euro, pastaj janë deputetët e Shqipërisë me 1080, të Maqedonisë me 1000 dhe të Serbisë me vetëm 860 euro. Por njohësit e ekonomisë dhe analistët politikë në vend thonë se në një vend me nivel të lartë të papunësisë dhe me varfëri të madhe është e papranueshme që paga e deputetit të jetë shumëfish më e lartë sesa paga mesatare në vend.

Nënkryetari i Kuvendit, Xhavit Haliti, ka thënë se përafërsisht në këtë nivel janë edhe pagat e deputetëve në vendet e rajonit.

“Nuk di se çfarë të them për këtë çështje. Po përafërsisht aty janë edhe në vendet e rajonit, 100 apo 200 më shumë ose më pak”, ka thënë Haliti.

Kurse, njohësi i çështjeve të ekonomisë, Haki Shatri, ka thënë se paga aktuale e deputetëve do të ishte e pranueshme sikur ata të punonin 22 ditë në muaj dhe sikur ta kryenin punën me përgjegjësi. Por sipas tij, duke e parë mospunën e deputetëve edhe 500 euro janë shumë.

“Sikur të punonin si ka nevojë të punohet, pra nëse punojnë sa për t’i merituar ato, atëherë nuk do të ishin shumë të larta. Por me mospunën që e bëjnë edhe 500 euro do të ishin shumë. Deputetët duhet të konsultohen me ekspertë të fushave e jo siç po ndodh që as dokumentet që i trajtojnë nuk i lexojnë. Ata duhet të punojnë 22 ditë në muaj”,  është shprehur Shatri.

Ai madje ka thënë se në Kuvend, gjysma e deputetëve janë analfabetë dhe Kuvendi po shfrytëzohet vetëm si mundësi punësimi për militantë partiakë.

“Përshtypja ime është që në dy mandatet e fundit, punën e deputetit më shumë e kanë bërë si shans që disa militantëve partiakë t’iu sigurohet një vend pune dhe t’i pozicionojnë në vende ku kanë sado pak autoritet. Më vjen keq që e them këtë, por gjysma e tyre janë analfabetë në këtë legjislaturë, e vendosin për ligje”, ka shtuar Shatri.

Pagat e deputetëve, enorme krahasuar me të qytetarëve

Opinionisti Imer Mushkolaj ka thënë se çështja e pagave të larta është punë e moralit të deputetëve, për shkak se Kuvendi si institucion ka vendosur që deputetët t’i marrin këto paga. Mushkolaj ka thënë se në një vend të varfër e me gjitha këto probleme sociale është shumë e papranueshme dhe absurde që deputetët të paguhen shumëfish sesa që është rroga mesatare në vend.

“Kjo bëhet edhe më problematike kur kemi parasysh se shumica e kësaj legjislature marrin paga kot, pasi nuk marrin pjesë në seanca, disa të tjerë e kanë bojkotuar punë e Kuvendit, disa të tjerë i shfrytëzojnë vetëm benefitet tjera, si udhëtimet jashtë vendit. Me këto paga nuk janë përfaqësues të popullit, ata thjesht i shfrytëzojnë qytetarët për t’i rritur privilegjet”, ka vlerësuar Mushkolaj.

Mushkolaj ka thënë se pagat e deputetëve të Kosovës nuk duhet të jenë më të larta sesa ato të vendeve të rajonit.

“Nuk besoj që këta punojnë më shumë sesa kolegët e tyre në rajon. Ne nuk po kërkojmë që këta t’i bëjnë pagat minimale, sepse duhet të kuptohet edhe përgjegjësia politike, mirëpo ata duhet t’i nivelizojnë pagat me ato të vendeve të rajonit”, ka shtuar Mushkolaj.

Në fund ai ka thënë se iniciativa për uljen e pagave duhet të merrej pikërisht nga deputetët, por ai ka thënë se sa janë të gatshëm deputetët për t’ia ulur pagat vetes.

Kosova të mësojë nga shembujt më të mirë

Profesori universitar, Blerim Burjani, ka thënë se Kosova duhet të aplikojë modele të praktikuara më herët nga disa vende që tani janë pjesë e Bashkimit Evropian.

“Duhet që pagat e deputetëve të bien në një nivel që është më i pranueshëm edhe për taksapaguesin, por edhe për buxhetin e shtetit. Në të kaluarën vendet si Bullgaria apo Rumania para se të anëtarësohen në Bashkimin Evropian kanë reduktuar këto shpenzime të mëdha që janë bërë nga Parlamenti dhe Kuvendi. Dhe duhet që edhe Kosova të aplikojë disa modele të suksesshme të disa vendeve”, ka theksuar Burjani.

Sipas Burjanit, paga bazë e lartë e deputetëve nuk është shqetësimi i vetëm.

“Nuk është problemi vetëm te paga bazë por edhe përfitimet tjera, angazhimet në komisione, në seanca, pastaj pas përfundimit të mandatit ka përfitime tjera”, ka potencuar më tej Burjani.

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *