Një në çdo tre vetë në Kosovë, i papunë

Sipas rezultateve të Agjencisë së Statistikave të Kosovës (ASK), shkalla e papunësisë është afro 29%, pra i bie që çdo i treti në Kosovë të jetë i papunë.

Agjencia e Statistikave të Kosovës (ASK) ka publikuar rezultatet kryesore të Anketës së Fuqisë Punëtore, për tremujorin e katërt (TM4) 2016.

Sipas rezultateve, shkalla e papunësisë është afro 29%. Papunësia më e theksuar është te femrat me 34%, krahasuar me meshkujt me 27%. Shkalla me e theksuar e papunësisë është te grupmoshat 15-24 vjeçare me 52%.
Dy të tretat e popullsisë në Kosovë janë popullsi në moshë pune, ku në popullsinë e moshës së punës përfshihen moshat 15-64 vjeçare.
Në kuadër të popullsisë me moshë të punës, shkalla e pjesëmarrjes në fuqinë punëtore është 41 %.
Shkalla e punësimit në Anketën e Fuqisë Punëtore për tremujorin e katërt (TM4) 2016, është afro 30%. Punësimi më i lartë është te meshkujt me 46%, ndërsa punësimi te femrat është 13%.

Femrat janë të punësuara, kryesisht në sektorët e arsimit, tregtisë dhe kujdesit shëndetësor, me rreth 52 % të tyre, ndërsa meshkujt janë kryesisht të punësuar në sektorët e ndërtimtarisë, prodhimit dhe tregtisë me 44%.
Sektorët ekonomikë, që prijnë me punësim, vazhdojnë të jenë: tregtia me 14%, prodhimi me 13%, ndërtimtaria me 13% dhe arsimi me 10%.

Sa i përket të punësuarve me kontrata, del se 30% e personave të punësuar kanë kontratë të përhershme në punën e tyre kryesore, ndërkohë që 70% kanë kontratë të përkohshme.
Sipas rezultateve të AFP-së në TM4 2016, fuqia joaktive është mjaft e lartë, 59%.
Anketa ka pasur shtrirje në mbi 580 qarqe regjistruese në tërë territorin e vendit, ku janë anketuar afro 3 500 ekonomi familjare, të përzgjedhura sipas metodës së rastit nga korniza e Regjistrimit të Popullsisë, Ekonomive Familjare dhe Banesave 2011.

Ekonomitë familjare, të selektuara për anketim, përveç që kanë pasur një anketim, ato kanë pasur edhe tri ri-anketime sipas periudhës referuese.
Për realizimin e Anketës, metodologjia dhe standardet e aplikuara nga ana e ASK-së janë të harmonizuara me rekomandimet e Eurostatit.

***

Senatori amerikan, John McCain, dekorohet nga presidenti Thaçi

Presidenti Hashim Thaçi dekoroi senatorin amerikan, John McCain, me çmimin “Urdhri i Lirisë”, për kontributin e tij për lirinë dhe pavarësinë e Kosovës, si dhe për rolin e tij në thellimin e marrëdhënieve ndërmjet Kosovës dhe SHBA-së. Presidenti Thaçi tha se është i nderuar që ndan këtë çmim për një njeri si senatori McCain.
“Ju u bëtë zëri ynë kur ne nuk kishim zë. Ju me punën dhe angazhimin tuaj dëshmuat se liria është  e drejtë fundamentale për secilin individ dhe komb. i nderuar senator për kontributin për liri dhe pavarësi si dhe partneritetin e Kosovës me SHBA-në iu dekoroj me urdhrin e lirisë. Zoti ju bekoftë ju dhe familjen! Zoti e bekoftë miqësinë me SHBA-në”, është shprehur Thaçi
Senatori republikan, McCain, pasi pranoi këtë çmimi nga presidenti, tha se është thellësisht krenar dhe i nderuar për këtë çmim. Ai po ashtu duke u shprehur krenar që ndodhet në Kosovë pas periudhës së konfliktit dhe tragjedisë në këtë vend, vlerësoi progresin e arritur.
Senatori amerikan ka qëndruar për vizitë në Kosovë, në kuadër të turit ballkanik. Ai është takuar edhe me kryeparlamentarin Kadri Veseli e Kryeministrin Isa Mustafa, ndërsa mbajti një fjalim në Kuvendin e Kosovës. Nga Prishtina, McCain ka udhëtuar për në Tiranë.

***

Gjermania rikonfirmoi mbështetjen për procesin e integrimit evropian të Kosovës

Në kuadër të turneut në vende të rajonit, Ministri i Jashtëm i Gjermanisë, Sigmar Gabriel, qëndroi për një vizitë zyrtare në Kosovë.  Pas takimit që zhvilloi me Kryeministrin Isa Mustafa, ai tha se Gjermania e përkrah Kosovën drejt përmirësimit të kushteve te jetesës dhe drejt anëtarësimit në BE.

Gabriel ka kërkuar edhe vazhdimin e dialogut me Serbinë, ndërsa ka apeluar te deputetët e Kuvendit të Kosovës, ta ratifikojnë marrëveshjen për demarkacion me Malin e Zi, e cila  tha se do t’i hap rrugë liberalizimit të vizave.

Kryeministri Isa Mustafa tha se Kosova do të punojë në implementimin e marrëveshjeve që janë arritur ne Bruksel. Mustafa po ashtu kërkoj përkrahje nga Gjermania për liberalizimin e vizave dhe anëtarësimin në organizata ndërkombëtare, ndërsa theksoi se janë konsumuar të gjitha argumentet sa i përket kufirit me Malin e Zi dhe siç tha ai, s’ka tjetër kufi përveç atij që e kanë konstatuar komisionet shtetërore.

Mustafa foli edhe për themelimin e Ushtrisë së Kosovës, duke deklaruar se janë planet për të dhe se ekziston një pajtim i të gjitha strukturave politike në krye me Presidentin Hashim Thaçi që ushtria të bëhet në koordinim me NATO, Bashkimin Evropian dhe SHBA-në.

***

Ndërkombëtarët të binden nëse nuk ka rrugë tjetër për krijimin e Ushtrisë së Kosovës

Rruga më e mirë e transformimit të FSK-së në Ushtri të Kosovës është ajo e ndryshimeve kushtetuese. Kur të shteren të gjitha mundësit atëherë duhet që bashkësia ndërkombëtare të bindet se nuk ka rrugë tjetër përveç ndryshimit të ligjit. Kështu u tha në debatin e organizuar me temën se “Çka mund të bëjë Kuvendi i Kosovës për transformimin e FSK-së në Ushtri”.

Kryetari i Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës, Daut Haradinaj në debat tha se duhet të pritet që kjo të bëhet me ndryshime kushtetuese, por edhe aleatët e Kosovës t’i bëjnë presion Listës Serbe që t’i votojë këto ndryshime.

***

VV me akuza të rënda ndaj Policisë së Kosovës dhe politikës

Sekretari organizativ i Lëvizjes Vetëvendosje, Dardan Molliqaj ka hedhur akuza të rënda në drejtim të kryetarit të Kuvendit të Kosovës, Kadri Veseli, deputetit të PDK-së, Elmi Reçica, drejtorit të Policisë së Kosovës, Shpend Maxhuni, si dhe Rashit Qalajt.

“Kemi ndërtuar një strukturë sipas qëndrimeve tona që paraqet një strukturë të krimit të organizuar brenda Policisë së Kosovës. Në krye të krejt skemës është Kadri Veseli”, ka thënë ai.

Sipas VV-së, në krye të kësaj strukture është Kadri Veseli, ndërsa krahu i tij i djathtë është deputeti Elmi Reqica, duke vazhduar me Shpend Maxhunin, Rashit Qalaj etj.

***

Reagon policia e Kosovës

Disa orë pasi sekretari Organizativ i Lëvizjes Vetëvendosje, Dardan Molliqaj, doli në një konferencë për media për të treguar atë që ai e quajti një skemë kriminale të udhëheqjes së Policisë së Kosovës nga kryetari i Kuvendit të Kosovës dhe i PDK-së, Kadri Veseli, ka ardhur reagimi i Policisë së Kosovës.

Policia e Kosovës nëpërmjet një komunikate pretendimet e Molliqajt se “Policia udhëhiqet nga strukturat kriminale të PDK-së”, dhe “Për vite përgjimet nga Policia e Kosovës janë bërë jashtëligjshëm”, i cilëson si të pavërteta.

Policia e Kosovës është institucion i zbatimit të ligjit dhe në mandatin e sajë ligjor ka për mision Ruajtjen e Rendit dhe Sigurisë Publike, Sigurinë e Përgjithshme në vend, si dhe funksionon në kuadër të kompetencave kushtetuese dhe ligjore”, thuhet në këtë komunikatë.

Struktura udhëheqëse e Policisë së Kosovës sipas kësaj komunikate mundëson “menaxhim profesional sipas metodave të njohura menaxhuese për të gjitha çështjet organizative, operacionale dhe hetimore brenda PK-së”.

“Sa i përket dyshimeve dhe deklarimeve të pavërteta të z. Molliqaj, i cili përpiqet të paraqes Policinë e Kosovës si institucion jo profesional, dëshirojmë edhe një herë të ri-theksojmë se Policia e Kosovës është institucion profesional, e pa lëkundur në përmbushjen e misionit, vizionit dhe objektivave të saja dhe e pa ndikuar nga çfarëdo ndikimi apo pretendimi nga jashtë, duke përfshire edhe pretendimet e pavërteta dhe tendencioze të z.Molliqaj”, thuhet në reagim.

Sipas PK-së, tendenca për të paraqitur Policinë, si institucion i ndikuar nga faktorë të jashtëm e në veçanti duke u përpjekur të linçojë stafin menaxherial të PK-së, nuk kuptohet ndryshe veç se “njollosje, dhe etiketim i vlerave që përfaqësojnë personelin policor, të cilët  sakrifikojnë ditë dhe natë për sigurinë e qytetarëve të Kosovës”.

***

Kërkohet përkujdesje për familjet e dëshmorëve

Deputeti i PDK-së, Bislim Zogaj në Kuvendin e Kosovës përmendi problemet me kategoritë e dala nga lufta e UÇK-së, në mënyrë të veçantë familjet e dëshmorëve.
“Familjet e dëshmorëve janë të shenjta dhe gjithë shoqëria jonë duhet t’i ketë prioritet mbi prioritete këto familje. Prandaj kërkoj nga Qeveria dhe ministritë gjegjëse që t’i zbatojnë ligjet që i kemi miratuar në Kuvend, vendimet që i ka miratuar Qeveria dhe sa më parë t’i fus në listën e pagave familjet e dëshmorëve, të cilave u është pranuar statusi”, tha Zogaj.

Deputetët ngritën edhe çështje tjera.

Deputeti i Aleancës për Ardhmërinë e Kosovës, Daut Haradinaj ka thënë në Kuvendin e Kosovës se deklaratën e tij thënë ditë më parë, për të cilën ka pasur reagime edhe të brendshme edhe të jashtme, e ka thënë me vetëdije të plotë. Haradinaj theksoi se është keqinterpretuar deklarata e tij, në të cilën nuk e përjashtonte mundësinë e futjes në luftë nëse Ramush Haradinaj ekstradohet në Serbi.
“Asnjëherë nuk kam thënë se do të ketë spastrim etnik. Por në rast se mendojnë që nëpërmes një njeri apo transferimin e tij në Beograd, duhet t’ia vënë gishtin kokës, të kenë kujdes. Ata janë duke tentuar të spastrojnë Kosovën. Beogradi zyrtar po tenton. Jo Daut Haradinaj, jo shqiptarët. Por nëse duan të luajnë me zjarrin, puna e mbarë u qoftë”, tha Haradinaj.
Ndërkaq, Rexhep Selimi i Vetëvendosjes, e ngriti çështjen e tërheqjes së Projektligjit për FSK-në, duke ia rikujtuar Presidentit Hashim Thaçi premtimin për dorëheqje në rast se nuk bëhet Ushtria e Kosovës.
“Po ia rikujtojmë dorëheqjen, sepse ai e premtoi si kusht në rast të mos-kalimit. Prandaj, sot dorëheqja e këtij njeriu do duhej të vinte si pasojë e kësaj rrjedhoje”, tha Selimi.
Kuvendi njëherit zgjodhi Radojko Trifunoviqinanëtar të Këshillit Gjyqësor të Kosovës nga radha e komunitetit serb. Komisionin për zgjedhjen e këtij anëtari e bojkotoi opozita.

***

Jepen rekomandime për mbikëqyrjen e zbatimit të Ligjit për Partneritet Publiko Privat

Anëtarët e komisionit për Buxhet dhe Financa kanë parë të arsyeshme të japin rekomandime për mbikëqyrjen e zbatimit të Ligjit për Partneritet Publiko Privat. Kështu Safete Hadërgjonaj, anëtare e këtij komisioni nga radhët e PDK-së, me këtë rast ka ofruar disa rekomandime.

“Rekomandimi ynë kryesor është që autoritetet kontraktuese t’i përforcojnë stafin teknik, të kenë personel të kualifikuar në mënyrë që të bëjnë menaxhimin projekteve dhe mbikëqyrjen e procesit të transaksioneve që kanë të bëjnë me partneritet publiko privat, përgatitjen e tenderëve, specifikimin e të tjera”, ka thënë Hadërgjonaj.

Kurse anëtarja e Komisionit nga radhët e Vetëvendosjes, Shqipe Pantina tha se disa nga rekomandimet që janë në raport do të duhej të ishin më ndryshe. Megjithatë, kryetari i Komisionit për Buxhet dhe Financa, Naser Osmani, tha se më e rëndësishmja për këtë ligj janë dy çështje.

“Ajo që është më e rëndësishme është çështja e mbikëqyrjes, zbatimit në kuptimin e detajizimit të një kontrate me shtetit dhe partnerit privat, por edhe një institucioni, i cili në mënyrë rigoroze e përcjell zbatimin e asaj kontrate”, tha Osmani.

Komisioni po ashtu me vota unanime ka votuar edhe shqyrtimin e projektligjit për Mbrojtjen e Fëmijës dhe amendamenteve të Komisionit funksional për të Drejtat e Njeriut dhe Barazi Gjinore.

***

Sindikata e PTK-së kërkon hetim për kontratën më Z-Mobile

Sindikalistët e PTK-së kanë reaguar pas vendimit të Gjykatës së Arbitrazhit kundër PTK-së nga ana e “Z-Mobile”, vendim i cili thotë se Telekomi i Kosovës-Vala, duhet t`i paguajë rreth 30 milionë euro Devolli Group apo Z-Mobile. Në një konferencë për media, kryetari i Federatës Sindikale të PTK-së, Lamih Balaj, ka thënë se janë kundër realizimit të kësaj pagese. Ai ka kërkuar nga Prokuroria e Shtetit të merret me hetime të mirëfillta në këtë proces.

“Duhet prokuroria të kallëzojë veten se punojnë për këtë vend…”

Lamaj ka thënë se kontrata është nënshkruar me heqjen e një neni të rëndësishëm me të cilin i janë krijuar favore Z-mobile. Kontrata ka pasuar ndryshime deri sa është nënshkruar ka thënë Balaj, duke hedhur dyshime tek bordi si dhe menaxhmenti i asaj kohe.

“Jemi dëmtua jashtëzakonisht shumë sepse PTK nuk ka pas nevojë për një kontratë të tillë.”

Sindikata po ashtu kërkon që qeveria të merret me këtë rast, sepse ajo është aksionare e kësaj ndërmarrjeje publike. Po ashtu drejtuesit e Sindikatës theksuan se në asnjë formë nuk do të lejojnë që PTK-së ti merren 30 milionë eurot, duke paralajmëruar edhe masa tjera sindikale.

 – Përgatiti për TRT në Shqip, Muharrem SARAGJOLLI –

 

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *